الإخوة الكرام والأخوات الكريمات
السلام عليكم ورحمة الله وبركاته
من وحى الثورة المصرية الشعبية كتبت هذه الكلمات
وأرجو أن تنال منكم القبول والإستحسان
ثورة شعب
ياشعب يإللى بتدق على باب التاريخ
سمعت صوتك لكل الدنيا حتى للمريخ
لا همك رصاص ولا واحد ماسك سيخ
ووقفت متل السد شاب وبنت وشيخ
ولد وبنت وست ومعاهم راجل عجوز
إنت لوحدك تقول يجوز ولا مايجوز
شباب زى الفل وبنات زى اللوز
مصمم على مبدأك ومصمم إنك تفوز
حددت طريقك وحددت فيه المعالم
حددت موقفك وقلتها بوضوح للظالم
لابد إنك ترحل ونشوف حل للمظالم
كفاية بقى تلاتين سنة على نفسنا كاتم
مهما كان الطريق طويل صبرنا أطول
حلفنا كلنا نمشيه وما نرجع زى الأول
وعن كل حقوقنا مايوم عمرنا نتحول
ولعهدنا لكل إخواتنا مايوم راح نبدل
ياما صبرنا على الذل سنين وسنين
ونقول بكرة تتعدل والبلة تزيد الطين
بالقهر وحكم العسكر لسه محكومين
ولما عرفنا الطريق قلنا مش راجعين
من بعيد شايفين فجر بينده علينا
بيشاور بإيده وبضحكة بيحيينا
بإدينا نزيح الليل عشان يرجع لينا
ونقول يارب إنصرنا وهون يارب علينا
فات الكتير يابلدنا مابقى إلا القليل
وهنفضل هنا صامدين حتى يوم الرحيل
ونفسنا ماراح ينقطع أصل نفسنا طويل
دا إحنا إللى بنينا الهرم والسد فوق النيل
بقلمى
د/جميل الشريف