بسم الله الرحمن الرحيم
دعوة للتدخين
أوعى تسمع كلام اللى يقول لك بطل سجاير .. دة يبقى واد توتو وما يعرفش فوائد التدخين
التدخين يضفى عليك مظهر الرجولة
اذا كنت حاسس أنك عيل ومنظرك ما يجبش راجل أبدا .. أمسك سيجارة وأنفخ فى وش خلق
الله .. هيفكروك راجل على طول
التدخين ببطء وبتركيز يعطى أيحاء بأهميتك وعمق تفكيرك
أذا كانوا الناس مستهيفين شخصيتك ومنتش مالى عينهم .. ولع سيجارة وأسحب كل نفس منها
ببطء وأنفخة لفوق بعنطزة .. الناس هيفتكروا أنك عقلية معملية فذة وهيبقى شكلك ولا لاكى
لوك فى زمانة
تدخين السجائر علاج ممتاز لبطء التفكير
أذا أتزنقت وذكائك مش ساعفك بتصرف سريع .. ولع سيجارة .. وعلى ما تولع وتشد وتنفخ
يكون ربنا فرجها وطلعت رد
التدخين يجمع البنات الحلوة حواليك
ويحوطوا سريرك كمان ويقعدوا يتغزلوا فيك ويقولوا لبعض : ياسلام لو كل العيانين اللى
بيدخلوا لنا قسم الامراض الصدرية شباب حلوين كدة
التدخين يحافظ عى مظهرك ويحميك من مشاكل الشيخوخة
ما هو هيموتك بدرى قبل ما تلحق تشيب أو تصلع
السيجارة تجعل منك رجلا ذو بصمة لا تمحى من ذاكرة الناس
أى حتة تدخلها مش ممكن ينسوا أنك شرفتها .. وحتى اللى دخلوا بعد خروجك هيعرفوا أنك كنت
موجود من الريحة
السيجارة تكسب الاحترام
أول ما تدخل حتة الناس تقوم واقفة على حيلها .. ويروحوا جرى يفتحوا الشباك
التدخين يضفى عليك الوقار والهدوء
لو أنت بتدخن من زمان وحاولت تمشى بسرعة أو تجرى وتنط السلم زى العيال هاتنهج ونفسك
يتكرش وهتبقى حالتك تصعب على الكافر
السيجارة بتهدى الاعصاب لما تكون متغاظ
هو صحيح فى حاجات كثير ممكن تهدى الاعصاب زى الينسون أو الكركدية .. بس شكلك
بالسيجارة بيحسس الناس أنك فعلا شايط وبتطلع دخان
التدخين يحسن علاقتك بزوجتك
أنت بتفقد حاسة التذوق تدريجيا .. فمش هتاخد بالك من طعم العك اللى مراتك بتطبخة .. وتوفر
علي نفسك البهدلة لو أتريقت عليها
أتمنى أكون وصلت فوائد التدخين .. ونمتنع بجد عن التدخين
مع قبول تحياتى
مازن المصرى
دعوة .. للتدخين
العرض العادي
