أنا إنسان بسيط
مش حرامى ولا هلامى
ولا عايش فى أوهامى
ولا مكتئب بلعن أيامى
أنا إنسان بسيط
لا أنا سياسى حويط
ولا صحفى غاوى تنطيط
ولا جبان ماشى جنب الحيط
ولا غبى وأهبل وعبيط
أنا إنسان بسيط
عايز لقمة حلال
أوكل بيها العيال
وأعلم بنتى دلال
وده عايز مال
أنا إنسان بسيط
بفهم شوية فى السياسة
وما تنقصنى خبرة وكياسة
وأفهم إن الرياسة عدل
ومهمة صعبة وحساسة
مش ظلم وبغى ونخاسة
أنا إنسان بسيط
بصلى فرض ربنا بمعاد
وأأدى كل حقوق العباد
وبجاهد نفسى وعارف
إن ده أعظم جهاد
أنا إنسان بسيط
بحب أعيش فى حرية
حرية فيها مسؤلية
وبكره كل المعتقلات
وبنادى بحكم الأغلبية
أنا إنسان بسيط
بكره زباينة السلطان
بكره البغى والطغيان
وبكره الذل والحرمان
وبحب أعيش كدا فى أمان
أنا إنسان بسيط
بحلم أشوف عهد جديد
وأشوف الكل مبسوط وسعيد
ويطلع بعد الليل صباح
وينور يومنا فجر جديد
والحكاية بإختصار
بحلم كل ليلة بنهار
وألاقى الباغى راح وغار
وألقى فرحة فى كل دار
وألاقى بلدى فى رخا وعمار
داحلم إنسان عادى
تلاقيه فى كل بلادى
فى الصعيد ولا فى الوادى
بحلمه بيصرخ وينادى
بقلمى
د/جميل الشريف