الإخوة الكرام والأخوات الكريمات
السلام عليكم ورحمة الله وبركاته
هذه خواطر عفوية هتفت على عقلى وأنا أشاهد مايحدث من
ضرب وإهانة وتعذيب وإعتقال وقتل لشعبنا المصرى العظيم
لأنه قرر أن ينفض عنه الجبن والتخاذل والسلبية ويطالب بحريته
وأسميتها
لافتات للحرية
باقى إيه يا بلدنا نخاف عليه
بعدما نهبونا وظلمونا ولاد الإيه
حد يصدق إن اللحمة بسبعين جنيه
...
وما عاد فيه شيئ بربع جنيه
الله يرحم زمن سمعنا عليه
كان الرغيف بتعريفة وكيلو اللحمة بجنيه
كل حاجة بقت تتباع حتى الضمير تشتريه
***********
يامصرى ياإللى تاريخك متخضب بدم
قوم إنفض عنك حزنك وإنفض معاه الهم
وإنده على أخوك وجارك وصاحبك وإبن العم
...
حط إيدك فى إيده وبينا نزيح عن بلدنا الغم
***********
بوعزيزى يابطل الأبطال
ضربت لنا أروع الأمثال
الله يرحمك ويغفر ليك
...
ويلعن الخونة الأنذال
*************
أنا مصرى من نيلها إرتويت
ولشعبها الطيب أنا حبيت
لكن لما شوفت حالها بكيت
...
ولما ضربو إبنى أنا إتذليت
وصممت آخد بتارى منهم
عشان كدا أنا لكم جيت
*********
توت توت توت توت
سرقو منا حتى القوت
متنا اليوم ولا بكرة
...مصيرنا يوم هنموت
يلا بينا ياعم محمد
ع الباغى ندوس ونفوت
*******************
السلام عليكم ورحمة الله وبركاته
وأسعد الله كل أوقاتكم بكل خير وبركة
يشرفنى أن أقدم لكم مجموعتى الثانية من
لافتات للحرية(2)
الحزن مبدور على الطريق وعلى أغصان الشجر
تلاقيه فى كل مكان حتى فى حبات المطر
وشايف سواعد ممدودة بتتوحد وقت الخطر
...
و فجر بيشاور من بعيد وبيضحك لنا وللقمر
************************
أقسمنا ميت يمين ياباغى مش راجعين
وهنفضل هنا فى وجه الرصاص صامدين
نصرخ فى وجه الظلم وكلنا كدا متوحدين
...
وهنخلعك ونبدر على كل طريق ياسمين
***********************
يامصرى ياللى تاريخك فى الجبل محفور
اليوم صحيت وصرخت لما جه عليك الدور
تقول للباغى حل بقى يا أخى من وشنا وغور
...
خلاص إحنا عرفنا الطريق وعرفنا إزاى نثور
************************
لما تزرورى قبرى يامه ماتنسى تدعى لى
وخلى أخويا وعمى وإصحابى يقيدو قناديلى
وبقولك يامه عمر دمى عمره ما هيروح هدر
...
ولما نتتحرر زغرتى وإمسحى دموعك بمنديلى
ولكم منى أرق تحياتى
د/جميل الشريف