مذكرات مطحون فى هلوسه عين شمس
مذكرات مطحون فى الهلوسه
صباح يوم جديد اشرق على طالب كليه الهلوسه (الهندسه سابقا)بلا اى اضرار من التى يتعرض لها من هم من امثاله من( المهلوسين) تلك الاعراض التى تتلخص فى الاتى:
1- صعوبه فى النطق
2- الاحساس بشلل عام (مجرد احساس)
3- ظهور رياله كتلك التى تظهر عند التسنين لدى الاطفال
4- تساقط الشعر(من كتر الهرش والتفكير)
5- حولان بالعين (من التدقبق فى المللى والمعامل)
6-تقوس فى الظهر حتى يكاد يكون شبيه برقم 6
7- مرحلة الهرتله والتى تلى الاستيقاظ من النوم وتريدد كلمات (المحاضره_الغياب_الشيتات_اللوح)
طبعا شكر ربه وباس ايده وش وظهر لانه سليم وبدأطقوسه اليوميه:
فطار سريع على الواقف بعد كده شال اربعتاشر مرجع على ايده ونزل الشارع المصرى.
وقف على المحطه يستنى الفرج(الاتوبيس) اللى جه بعد نص ساعه مش مشكله الحمد لله انه جه اساسا
( وسع ياعم اتاخر ياباشا رجللك يابيه ركبت ياحماده )
كلمات اعتاد ان يسمعها يوميا من الكمسرى اللى مش بيبطل خبط وكلام وزعيق
المهم الاتوبيس طلع بحموله لابأس بها من البشر بتاع 160 بنى ادم بس
وبدأت رحله المعاناه والتريقه والكلام البايخ بتاع كل يوم:
(نزل المسطره دى شويه هو انت بترفع المقاسات ولا ايه) حاضر
(ايه كل الكتب دى قال الواد بيذاكر قال ) معلش
(قولى يا خويا هو السد العالى مبنى بالرمل ولا بالاسمنت)
زىءىءىءىءىءىءىءى الاتوبيس يفرمل وكله يصرخ (ما تحاسب يا سطى)
طبعا السواق يزعل ايه اسطى دى دا انا معايا الاعداديه طب والله ما سايق شوفوا بقى هتروحوا مصالحكم ازاى؟
يتبرع ناس كباره ودمغهم توزن قدره فول قصدى توزن بلد ويتحايلوا على الباشا السواق عشان يطلع ويكمل سواقه
شويه والاتوبيس يوقف تانى فى ايه ياعم اصل الكمسرى نزل يجيب عيش ايه بلاش يكلوا يعنى دى حتى يبقى حرام
(يالا اللى عايز عبده باشا)ودى محطه كليه الهلوسه يقوم ( ينط) صاحبنا من الباب بعد مايكون خد كام شلوط على كام كوع
يجرى بسرعه عشان يلحق المحاضره ويعوض لكاعه الاتوبيس الباب اهو هناك يجى يدخل منه يلاقى ايد بسم الله ما شاء الله ولا ايدابو الهول:
- كرنيهك يا بشمهندس
- ياسيدى ما انت بتشوفه كل يوم
- معلش الاوامر كده
- حاضر اهو
الحمد لله وصل للمدرج بسلام طبعا مستحيل يلاقى مكان فاضى فيتبع العرف الجارى ورقه من الكشكول واديها ارضى ما اصل كلنا منها منها هنتكبر بقى عليها ليه؟
فجأه يسود صمت رهيب المدرج ايه ياعم اصل الدكتور دخل (الاحترام حلو بردو اسكت بمزاجك احسن ما تسكت بال...)
ساعه ونص من الكلام العلمى الخفيف على الودن تقيل على القلب من عينه
(ثيتا وايتا وفاى وباى وناو وميو ................الخ)
يخرج الدكتور يتنفس الطلبه الصعداء وياعينى ميلحقوش يكملوها ليه يا سيدى اصل المحاضره التانيه بدات والدكتور جه
محاضره اتنين تلاته بعدهم معملين وسكشن دا المتوسط اليومى بتاعنا
بعدها طبعا لازم تروس مخك تزنجر وتربس بالف ترباس
اليوم خلص فى الساعه 6 مساء يرجع البيت بنفس المسطره والاربعتاشر مرجع وعليهم هدايا من الدكاتره بتاع حوالى 20 شيت لازم يتحلوا النهارده ويتسلموا بكره
وطبعا مش بس كده دى فى كمان ريبورتات وبروجكت بعد بكره
(اللهم زيد وبارك)
بالذمه الكلام ده بيحصل فى اى حته غير بلدنا المصون يعنى الطالب لازم يطلع عينه فى المواصلات وتتقطع هدومه وبعد كده تتوقعوا منه انه يكون عنده استعداد يستوعب محاضراته
الذ ما فى الموضوع ان الطلبه (وانا منهم يعنى) حابين المجال اللى هما فيه
وعلى راى المثل(لاجل الورد ينسقى العليق)
ويارب يــــــــــــــــــا رب ما تشوفوا اللى احنا فيه
|
العرض العادي
